【肥妹小編被治療的日子】前奏篇
多謝各位支持，所以小編要找數啦。
話說小編其實應該由六歲之後都無瘦過，咁又唔係超哂標嘅 #我估... 是關媽媽煮餸實在太好食，豉油雞、蜜汁煎雞翼呀、魷魚肉餅... 其實蒸個水蛋都覺得好好食... 其實唔係佢D野太肥，而係自小教落唔好浪費食物，所以係一定會食哂檯上嘅野。而因為媽媽係個知慳識儉嘅人又怕我地食唔夠，通常買多D就會平D，所以每餐款式同份量都幾多下。#仲有佢D湯都好好飲
日積月累之下，愈來愈肥，經常徘徊係150-160磅，小編並唔係無做運動嘅人，打泰拳呀、跑步呀、行山呀等等我都成日做，但唔知點解下半身、四肢都係勁多肉... 有次同呀媽去沙X王食野，如果大家有去開就會知道有個好似水桶咁嘅位，坐左入去基本上係睇唔到下半身，呀媽講笑咁話：呀妹，第日您去相睇要揀呢個位，因為您坐底唔起身，人地會覺得您好Fit，唔知您原來咁巨... #唉
之後，可能工作壓力，有一年我連運動都無心機做，個人頹哂咁，仲要條腰肌肉唔個點解發炎，結果就再肥D。後來，我決定辭職希望抽多D時間做多D有意義嘅野，同陪屋企人，因為長時間都係屋企工作，而且壓力比之前大減，依家應該係我人生最高嘅磅數...175磅
【點解會去揀中大果營養研究中心呢？】小編係讀緊應用心理學碩士，有堂課係講Eating Disorder，即係厭食／暴飲暴食，Professor 係堂上播左條片，係TBB拍嘅星期x檔案，入邊條片有兩個主角，一個係中年男人，超哂標果隻，就跟中大營養果邊減肥，另一個係做茶餐廳廿幾歲嘅女仔，就跟左一間減肥公司減... 結果係中年男人減左半年，佢係輕鬆地減，同埋好明顯係健康的Fit，Fit到連佢老婆都跟埋去一起減。反觀，廿幾歲嘅女仔減得好痛苦，日日好似被迫咁... #小編好努力搵緊段片希望Share到俾大家睇
其實我只係想健康的減，因為我知道亂咁減，係會影響情緒，長期餓住心情都會燥D啦。
【決定去見營養師】
唔知係咪整定呢？本身我預左要排期，點知呢我打去Book 嘅時候，個接線姐姐話有個Patient改左期，我即日下午有得見 #正呀 咁梗係即去啦
去到時呢，首先Reception姐姐 (其實可能係妹妹) 叫我填左份Form，係關於我日常飲食同病歷記錄，然後佢就安排我量高磅重，量血壓，Check 脂肪比例...
做好哂呢D程序後就見營養師 #佢好Nice同好有耐心解釋我嘅情況，包括超哂標果D野啦... 另外，佢仲幫我度腰圍，Well，都係超左正常人嘅情況...唔係, 係超左一個正常男人嘅腰圍尺寸...
#touchwood 好彩都有樣野係好靚，就係我D血壓 #感恩感恩
營養師好詳細咁教我點去飲食，同了解我平時飲食嘅問題...